Kòkòt ak Figawo.
Lè Kòkòt te ti moun avèk rad a dantèl
E Figawo te kòn mete pantalon ak bretèl
Youn pat ka wete je l sou lòt
Yon sityatyon ki pat fòt
Ni youn ni lòt
Malgre vi yo pase nan 2 diferan pòts.
Kòkòt pitit boujwa, bèl marabou
Figawo, pitit pòv, ki tap viv nan lakou.
Kòkòt manje ragou
Figawo pran rapadou.
Kòkòt pat dwe mele
Ak ti moun ki pa pale
Sèlman franse.
Figawo te dwe kòn ran l pou l pat ranse
Ak pitit moun serye,
Sinon papa Kòkòt ap firye.
Yo te kòn kwase lè yo pral lekòl.
Kòkòt ak jup plise sou kò l
Figawo ak rad eskampe
Men yon ti gason byen kampe.
Kòkòt, bèl kou poupe
Poutan tou de rete bouch pe
Y ap gade e y ap admire an silans
Timidite fè youn pa vle pran chans
Pou di bonjou. Lè je yo kwase, yo nèk souri.
Kè yo bàt fò kòm yon malad ki pè paske l pipi dri.
Yo pale premye fwa lè nan première communion
Yo te ose fè youn simp conversation
Yo te swete youn lòt mes compliments!
Sa pat antre nan santiman
Papa Kòkòt. Li pimpe l Pòtoprins kay tant li,
Gran sè papa l pou koupe kontak ant Figawo e li.
Yo vin rankontre 6 an apre nan yon match volleyball.
Figawo kòm seminaris te nan ekip volleyball
St Martial. Kòkòt nan ekip Lalue. Kòkòt osi bèl
Ke Figawo kosto. E ben fwa sa a yo te kose bèl.
Figawo te al dépose l lakay li tou pre pon Sen Gewo
Se konsa yo vin renmen e vin bo.
Figawo te ekri Kòkòt bèl powèm yo rele acrostiche
Avèk menm swen yon zwazo pran pou fè yon nich.
Chercher l’amour pour trouver le bonheur,
Ou fuir l’amour et connaitre le malheur.
Chérir une beauté naturelle
Offerte aux yeux par l’Éternel
Telle est ma mission quotidienne
En admirant Còcòte que j’aimerais être mienne.
Cléopâtre, Nefertiti, Anacaona
Ont eu leur règne.
Còcòte est maintenant la reine.
O Créature fascinante
Tu me hantes passionnément
Et je dis que je t’aime énormément.
Lò papa l vin kònsa, li pimpe l Kanada
E li savonen Figawo ki vin senti l pi piti ke bounda.
Minable que vous êtes, ne venez pas souiller ma princesse,
Avec vos pattes trempées de suie. Que votre fiéffée hardiesse
Vous permette de survivre dans une basse-cour
Et non de venir lui faire la cour.
Elle n’est pas de votre rang social
Et à votre pauvreté elle ne sera jamais loyale.
Vous ne serez jamais un bienvenu,
Même alors que vous serez un parvenu.
Ni Figawo ni Kòkòt
Youn pat kab blye lòt
Moun damou se san hont,
Yo toujou tounen menm apre yo fè kont.
Kòkòt ekri Figawo e di l je t’aime à la folie!
Figawo repòn je t’aime et c’est ma folie!
Figawo vin blye pawòl al fè pè
Pèdi Kòkòt, se sa sèlman li te pè.
Kòkòt e Figawo vin kontre nan inivèsite
Nan Montréal nan fakilte
Jeni. Tou de te entelijan
Lanmou yo vin fleri tou bon, tout jan.
Papa Kòkòt pat kontan,
Men Kòkòt te di sa pat impòtan.
Papa l sispan peye lekòl
Kòkòt te di sa te mèt zafè, avèk Figawo li pat poukòl
Nan la vi. Men li te blije travay pou l peye
Pou depans li. Li pat brendeng,
Li te ret nan deng
Figawo ki koulye tap ede l. Yo te de edidyan
Ki te gen anpil kran.
De toutrèl
Ki pat pè batwèl.
De nam ki te kòm de leman
Ki te kole magre tout touman,
Ki te anime de menm santiman,
Ki te sou menm longè dond menm sou menas chatiman.
Kòkòt pat ka viv san Figawo.
Figawo te viv pou Kòkòt kou epis powo
Ki bay manje fad bon gou,
Yon siwo ki fè l vin sou.
Yo te viv youn pou lòt
Ou pat wè youn san lòt.
Tou de te diplome nan tèt klas
Yo malgre yo soti dan de diferan klas
Social. Yo se examp lanmou total
Kapital, yon kado natif natal,
Kòkòt a Figawo vle di
De nam ki fònn pou bay yon sèl fwa di.